"Tanaïs est une rivière de Scythie qui s'appeloit premierement Amazonie, parce que les Amazones se lavoient en icelles : le nom luy fut changé pour telle cause. Tanaïs fils de Berose et de Lysippe l'une des Amazones, estant fort sage et continent hayssoit le sexe feminin, ne portant reverance qu'à Mars seulement, et avoit en mespris et desdain le mariage : mais Venus incita contre luy l'amour desordonné de sa propre mere, à laquelle il resista du commancement courageusement, mais surmonté de la necessité des espoinconnements furieux, et neantmoins desireux de persevere en sa pieté et chasteté, il se rua dans le fleuve Amazonien, lequel garda son nom."
